Дәүләт җыелышы Президиумы утырышы узды

Аны парламент Рәисе Константин Толкачев уздырды. Президиум әгъзалары республика парламентының чираттагы пленар утырышын 22 апрельгә билгеләде. Көн тәртибенә 40 мәсьәлә кертелгән, шуларның яртысына якыны республика законнары проектларын карау белән бәйле.

Пленар утырышта депутатлар Башкортстан Прокурорының республикада законлылык торышы турындагы мәгълүматны тыңлаячак һәм тикшерәчәк. Башкортстанда кеше хокуклары буенча вәкаләтле вәкил 2020 кеше һәм граждан хокукларын һәм ирекләрен үтәү турында доклад белән чыгыш ясаячак.

Президиум көн тәртибенә кертелгән иң мөһим закон проектлары арасында – “Сайлаулар турында Башкортстан Республикасы кодексына үзгәрешләр кертү хакында” закон проекты.

- Закон проектында берничә көн рәттән сайлауларда тавыш бирүне уздыру мөмкинлеге каралган, әмма өч көннән дә артык түгел, - дип шәрехләде парламент Рәисе Константин Толкачев. - Мондый карар сайлаулар билгеләнгән көннән алып ун көннән дә соңга калмыйча кабул ителергә мөмкин һәм яңадан каралмаска тиеш. Закон проекты сайлаулар турындагы республика законнарын федераль законнар яңалыкларына туры китерүгә юнәлтелгән. Берничә көн дәвамында тавыш бирү мөмкинлеге күп сайлаучыларга сайлауларда катнашырга мөмкинлек бирәчәк, димәк, тавыш бирү нәтиҗәләре гражданнарның фикерләрен һәм сәяси өстенлекләрен яхшырак чагылдырачак.

“Башкортстан Республикасының аерым закон актларына салымнар турында үзгәрешләр кертү турында” закон проекты салым түләүчеләрнең аерым категорияләре өчен кайбер преференцияләр билгеләүне күздә тота. Аерым алганда, күпбалалы гаиләләр өчен газ-мотор ягулыгында 150-200 ат көчле двигатель егәрлеге булган автомобильләрдә 50 процентка транспорт салымын киметү, шулай ук, Башкортстанның мәҗбүри медицина страховкасы өлкәсендә эшчәнлек алып баручы медицина оешмалары реестрына кертелгән, "акушерлык һәм гинекология" профиле буенча югары технологияле медицина ярдәме күрсәтүче медицина оешмалары өчен мөлкәткә салым буенча ташламалар билгеләү тәкъдим ителә.

“Башкортстан Республикасында җир мөнәсәбәтләрен җайга салу турында” закон проекты белән балалар (бер бала) үлгән күпбалалы гаиләләргә индивидуаль торак төзү өчен җир участогын милеккә түләүсез алу хокукын саклап калу тәкъдим ителә.

Шулай ук утырышта депутатлар “Страховка пенсияләре турында” Федераль законга үзгәрешләр кертү һәм “Русия Федерациясе закон актларының аерым нигезләмәләренең гамәлдә булуын туктатып тору, Русия Федерациясенең аерым закон актларына үзгәрешләр кертү һәм социаль пенсияне арттыру үзенчәлекләре турында” Федераль законның аерым нигезләмәләренең үз көчләрен югалтуын тану хакында” федераль закон проектын Дәүләт думасына кертү буенча Дәүләт җыелышы-Корылтайның закон чыгару башлангычы, Русия Федерациясенең аерым закон актларына үзгәрешләр кертү һәм страховка пенсиясен һәм социаль пенсияләрне арттыру үзенчәлекләре турындагы мәсьәләне караячак. Пленар утырыш ахырында Дәүләт думасыннан кергән федераль закон проектлары каралачак.

Фото: gsrb.ru

Автор: Фануз Хабибуллин

Источник: https://kiziltan.ru/articles/politika/D-l-t-ielishi-Prezidiumi-utirishi-uzdi-763777/?utm_source=vk&utm_medium=social&utm_campaign=32350601