Ә сез конкурста катнашасызмы?

Конкурска былтыр 1 августта старт бирелгән иде. 30 ноябрьгә кадәр муниципаль этап узды, анда 54 район катнашты. 1-7 декабрьдә һәр районда җиңүчеләрдән берәр гариза кабул ителде. Республика Башлыгы Радий Хәбиров карары белән конкурсның приз фонды 10 тапкыр арттырылды.

Ел ахырында Оештыру комитетының онлайн-режимда узган утырышында конкурсны үткәрү мәсьә­ләләре турында фикер алыштылар. Элемтәдә барлык муниципалитет вәкилләре бар иде.
“Быел барлык муниципалитетлар да эшкә актив кушылды, бу этапка 2114 гариза кабул ителде. Конкурс турындагы нигезлә­мәгә үзгә­решләр кертелде, билгеле, ул камилләштерелде, чөн­ки 2,5 мең кеше яшәгән авылларны 100 кеше яшә­гән­нәре белән чагыштыру мөмкин түгел, шуңа күрә без гадел­рәк бәяләү өчен барлык конкурсантларны дүрт төркем­гә бүлдек”, — дип хәбәр итте бәйгене Оештыру комитеты рәисе, республика Хөкүмә­тенең вице-премьеры, гаилә, хезмәт һәм халыкны социаль яклау министры Ленара Иванова.
Барлык муниципалитетларда аек һәм сәламәт яшәү рәвешен популярлаштыруга исәпләнгән төрле чаралар узды. Утырыш кысаларында иң уңыш­лы практикалар күр-сәтелде. Мәсәлән, Мәчетле районының Әҗекәй авылында велоузыш булган, анда спортның актив төрен яратучылар катнашкан. Сөләй-ман авылында урам бәйрәм-нәрен үткәрергә уйлаганнар, һәр урам арытаба эстафетаны тапшыра, ярминкәләр оештырыла.
Нуриман районында алкоголь сату һәм куллануга каршы көрәшне плакатлар һәм баннерлар урнаштырудан башлаганнар. Волонтерлар һәр гаилә белән аңлату эшләре алып барган. Авыл Советлары урындагы кибетләргә алкогольле продукция сатуны чикләү үте­нече белән документлар төзегән. Яңа Күл авылында эшкуар Фәнис Мөхәммәт­җанов үз кибетен­дә хәмер сатудан баш тарткан. Ул, авылда аны сатып алучылар аз, шуңа күрә сәү­дә ноктасына бу чикләү зур зыян китермәячәк, аның каравы, авыл­ның киләчәге өметле­рәк булачак, дип белдерде.
Баймак районының Ишәй авылында Ирләр советы, легаль булмаган хәмер саткан нокталарда рейд үткәреп, аңлату эшлә­ре алып барган. Алар сәүдәне туктатырга вәгъдә бир­гән. Куергазы районының Якшымбәт авылында яшьләрне генә түгел, өлкәннәрне дә физик культу­ра һәм спорт белән шөгыль­ләнүгә җәлеп иткәннәр. Авыл халкы дистан­циягә йөгерүдә көч сынашкан, футбол уйнаган.
“Бер генә район да әлеге чарадан читтә калмады. Баймак һәм Бөрҗән районнарында барлык торак пунктлар катнашты. Баймак районында бу хәрәкәткә — 89, Бөрҗәндә 34 авыл кушылды. Конкурста катнашучылардан 60 проценттан артык заявка җыйган Аскын, Әлшәй, Тәтешле, Шаран, Илеш, Нуриман, Дуван, Гафури, Зианчура, Зилаер, Күгәр­чен һәм Кыйгы аерылып торды”, — дип билге­ләп үтте Бөтен­дөнья башкортлары корылтае Президиумы рәисе Эльвира Аеткулова.
Күп кенә районнарда хакимият башлыклары баш­лангычы белән акчалата бүләк рәвешендә үз приз фондлары булдырылган. Мәсәлән, Зианчура районында гомум приз фонды – 600, Күгәрчендә – 490, Белорет районында 380 мең сум тәшкил иткән. Дүртөйле районында җиңүчегә 500 мең сумга юл төзеклән­дерелә-чәк, Туймазы районында җиңүче авылга мәдәният йортын ремонтлау өчен 300 мең сум бүленәчәк.
Конкурс кысаларында һәм Бөтенрусия аеклык кө-ненә багышлап Башкортстанда былтыр “кайнар линия” эшләде. Республика хал­кы 10, 11 сентябрьдә, 10 һәм 11 декабрьдә бушлай номер буенча шалтыратып, психотерапевтларга, наркологларга һәм психологларга мөрәҗәгать итә алды.
Республика халкы мондый конкурсларның кирәк­легенә инанды. Быел да аны түземсезләнеп көтәләр.

Автор: Резеда Галикәева

Источник: https://kiziltan.ru/articles/obchestvo/sez-konkursta-katnashasizmi-628421/?utm_source=vk&utm_medium=social&utm_campaign=32350601